Por Anxo Lourido
Mércores 4 de Setembro, 2024
© Asociación veciñal O Chedeiro de Cerponzóns
A Asociación Veciñal O Chedeiro de Cerponzóns fixo unha achega ao patrimonio bibliográfico da provincia.
Juan José Esperón, secretario da asociación, entregou ao servizo de Patrimonio Documental e Bibliográfico da Deputación de Pontevedra dous exemplares dos primeiros tomos de «Aller de Cerponzóns» e o libro «Patrimonio Etnográfico de Cerponzóns».
Os volumes pasarán a formar parte do fondo da Biblioteca da Deputación Provincial de Pontevedra, estando así ao dispor das persoas usuarias que desexen consultalos.
Trátase dun valioso material que documenta e recolle a historia e o patrimonio etnográfico da parroquia de Cerponzóns.
O libro «Patrimonio Etnográfico de Cerponzóns» é unha recompilación exhaustiva de datos sobre o valor cultural e o patrimonio da parroquia.
Os dous primeiros tomos de «Aller de Cerponzóns» ofrecen un percorrido polas noticias publicadas en prensa escrita entre 1852 e 1959 que gardan relación coa parroquia de Cerponzóns.
Ese traballo reflicte a evolución histórica e social da comunidade ao longo de máis dun século.
A intención de Juan José Esperón é completar esta serie no próximo ano coa publicación dun terceiro tomo, que cubrirá a década dos anos sesenta.
FONTE: PONTEVEDRA VIVA. 4/09/2024.
